بلا سياسة: حديث عالسكة

bila-siyasa-logo1

موقع إنباء الإخباري ـ
حسن ديب:
من السهل جداً بالغربة إنك تميز الشخص إذا كان جايي طازة من لبنان، والسبب ببساطة هو نفحة الإندهاش يلي بتنرسم على وجّو مجرد ما يشوف أيا منظر بالنسبة إلو مش طبيعي، وهيدا شي طبيعي، لإنو كلنا مرقنا بهالمرحلة وكنا في ما مضى متلنا متل أي شخص بعدو بأول حياتو بالغربة، لذلك مش عيب أبداً إنو الشخص الجديد يندهش عالطالعة والنازلة، إيه مين قال عيب، ما حدا، عادي القصة بتصير.
بتعرفوا إنتوا علاقتي مع القهوة، وخاصة الصبح بكير بتكون العلاقة حميمة زيادة عن اللزوم، فساقبت معي اليوم بسبب ضغط العمل إني إشرب غالون القهوة بالسيارة أنا وعالطريق، وعهيدا الطريق ذاتو كمان ساقبت إنو في خط سكة حديد، وعهيدي سكة الحديد ذاتها كل ما مرق ترن السكة بيوقفوا السير لحتى يقطع، ومن حُسن حظي اليوم إني كنت بالصف الأول عالإشارة تبع ترن السكة، هيدي من ميلة أولى من ناحية إنو بتاخدلك شفة قهوة والسيارة واقفة، بس من ميلة تانية، فمن سوء حظي إنو السيارة يلي حدي كان فيها شب لبناني من الشباب يلي متغربين جديد، يعني من جماعة الإندهاش، عادي يعني لهون كل شي عادي، بس يلي مش عادي إنو هيدا الشب بمجرد ما شاف الترن وشاف العالم معربشين من فوق وعالشمال واليمين إلا وفرط بالضحك، عن جد يعني فرط فرط مش إنو، هلأ الإندهاش طبيعي بس مش طبيعي يروح بين إيدينا من الضحك، بصراحة خفت عليه أنا قمت فتحت الشباك وقلتلوا حبيبي إنتبه مش عطول الضحك منيح أوقات بتروح فيها، قلي يا زلمة معقول، معقول، هيدا الشعب كيف معربشين هيك عالترن ، إنو ولو وينيي الدولة وين المسؤولين، هون أنا إنفقعت إندهاشة إلها أول بلا أخر، وقلتلو شو، شو؟ حبيبي شو؟ فيك تعيد الجملة لإني ما مركز معك، قلي إيه إنو وين الناس يلي شغلتها تنظم السكة الحديد،
تطلعت بحالي هيك وقلت العمى بقلبي شو إني محظوظ عهالصبحية، فكرت إطلع بالسيارة وفل بس ما انبلعت معي ، للصراحة حسيتها كبيرة ما بتنبلع، قلتلو دخلك حبيبي عنا بلبنان في ترن سكة شي ، قلي أكيد لا تعيش وتفيق بعدك عم تحكي بالترن، قلتلو إيه يا ترن ، هون في ترن متلك بس ما في مين ينظمو بس إنت بتعرف إنو بلبنان ما في سكة حديد بس في مدير عام للسكة، ولي بس بلبنان، هيدي بعد ما صارت إلا عنا، إنو يعني دولتنا عندا نظرة مبعدية ( يعني بتنظر لبعدين ) فقامت عينت مدير عام سكة حديد ومع الإيام شوي شوي بتركب سكة، ولي يا غزال إمك، في بلبنان ذرة وتخصيب يورانيوم شي؟ قلي لأ، قلتلو إنت بتعرف يا حبيبي إنو لبنان البلد الوحيد يلي في مركز دراسات وبحوث وما في شي يدرسو هالمركز، إنو عأساس بدن يخصبو لبن معزى مثلاً أو كيف. ولي إنت بتعرف إنو لبنان هو المزرعة الوحيدة بالعالم يلي إذا بدك تشتغل أي شغلة شو ما كانت بدك تجيب سجل عدلي لا حكم عليه وإذا بيكون عليك ضبط سرعة مش دافعو ما بتتوظف، بس إذا بدك تشتغل رئيس جمهورية السجل العدلي مش من شروط التوظيف، إيه حبيبي، ما بدك سجل عدلي، فيك تكون عامل السبعة ودمتها وما حدا إلو معك شي، إنو شو رح تكون عامل أكتر من جعجع، أحوي إدامك عليه كذا حكم إعدام ومؤبد وفي برقبتو دم أكتر ما في عالبسينة وبر، والزلمة راح يشتغل رئيس ما حدا قلو وينك، إيه صدق متل ما عم إحكيك ليش في مزح بيني وبينك، الزلمة قابض حالو جد ما شفتو هيديك اليوم لما كان واقف بين الشاشتين ونازل طق سوالف شي تكتك شي تيعا، كان مهرجانو قصة كبيرة. شو باك يا زلمة الحكيم بدو لبنان القوي شو مستهون القصة، بس يا رجل أكتر واحد كان مبسوط بالحكيم وعم يزقفلو هو كارلوس إده، شو بدك ما حدا فهم عالحكيم إلا كارلوس يمكن الحكيم وعدو إذا نجح يزبطو وزير إعلام يمكن، بس عن جد الحكيم قابض حالو جد، هلأ يمكن لإنو ما حدا قابضو، إنو يمكن، بس الزلمة عامل شوية شغل حلوين، طقم وكرافات وكارلوس وكذا، إنو إيه خبى البارودة وصورتو بالبدلة، وعم يغني بحبك يا لبنان عأساس إنو الناس بكلمتين رح تنسى يلي ماتو، بس أنا شايفلك ما رح تزبط معو، وبيني وبينك أنا نصحتو إنو يلعب عقياسو لإنو لبنان أكبر منو، بس يا خيي ما بعرف مين عم يعبيلو براسو إنو يطحش هالطحشة، ما تقلي فتفت لا لا ما بيعملها، فتفت إن شقت حالها بيتدخل بكباية شاي هلأد حجمو، بس أنا شايفلك إنو الحكيم رح تنفرك دينتو من ورا هالعملة، خاصة بعد ما بندر راح عبيتو، يعني بس المعلم يفل بتفرط المسبحة، شو في ورانا خيي بكرا بتبين الأمور لحالها.
صحيح دخلك بشو كنا عم نحكي نحنا، إيه الترن مزبوط موضوع الترن، دخلك مرق الترن ما هيك، إيه لكن حضرتك شو بعدك عم تعمل بنص الطريق، روح إنقحط عشغلك بعدك جديد بالبلد متغرب حتى تبني حياتك، روح حبيبي روح خليك بشغلك وشو بدك بالناس وين بتعربش، ما طول عمرنا بلبنان هالسياسيين معربشين عضهر الشعب والشعب ترن وماشي ما شايف شي، روح حبيبي عملّك شي شغلة تنفعك، ودير بالك عشغلك،ع فكرة تشرفت بمعرفتك، إنشالله بنشوفك، بس بشرفك إذا شفتك مرة تانية، فوت فيها حالة طقس وخلينا بلا سياسة …

اضف رد

لن يتم نشر البريد الإلكتروني . الحقول المطلوبة مشار لها بـ *

*