من الفايسبوك: رسالة الصديق سعيد قدموسي للكاتب فواز طرابلسي

facebook-saeedkadmousy-fawaztraboulsi

كتب الصديق سعيد قدموسي على صفحته على الفايسبوك الرسالة التالي للكاتب فواز طرابلسي:
فواز طرابلسي حبيت احضر الحلقة عالميادين لشوف بأي منطق بدك ترد على زياد الرحباني.
حضرت الحلقة وحسيتك ضايع وما بتعرف شو بدك تحكي وميولك السياسية يلي عم تحاول تخفيها واضحة وصريحة .. وقبل ما تتحفنا بآراءك السياسية المبنية على تاريخ نضالي حضرتك بتحكي عنو وشايف حالك فيه .. هالتاريخ بدو تواضع وموضوعية بقراءة الصورة يلي حولك وحواليك .. مو شايفها الا من زاوية ضيقة .. صار فيك متل مارسيل خليفة يلي انا كتير بحترمو ورح ضل احترمو .. رغم انو ما احترم وجعناااا كلنا كسوريين ..
صحيح نسيت انك طرابلسي .. طبعا كنت عم تحكي عن علاقة الرحابنة بآل الأسد .. وكان سياق كلامك اتهام ..
على كل انت بتتهم الكل الا نفسك لانو اذا بقلك رح تقلي انا ضد آل سعود وضد الصهيونية وضد الامبريالية وكل هدول .. انا ضد كل شي .. مشان تبرر لنفسك الوقوف ضد آل الأسد ..
على فكرة فيروز وفية .. ما في آل بالدنيا بدون خطأ .. بس آل عن آل بيفرق كتير يا آل باتشينو اليساري .. بعتقد انت ما فيك تقيّم الناس ولا بيطلعلك .. فكيف زياد وفيروز ..
انت قلت انو حزب الله داخل بحرب بين النظام ومعارضتو .. بهالحالة المعارضة السورية المعتدلة عم تقاتل النظام بأغصان الزيتون بدون أسلحة بالكلمة وبالموقف .. يعني بدون دعم استخباراتي غربي وعربي وإقليمي ولا مشافي اسرائيلية ولا مال شعبي عربي ولا فتاوى تكفيرية ..
يا أما انت ما بدك تشوف الحقيقة كلها لانو برأيك التحالف مع الشيطان بهالمرحلة مقبول لحتى يزول الخطر الديكتاتوري يلي مو شايفين غيرو بالدنياااا ..
للأسف خايفين على يساركن وافكاركن وأحلامكن وضايعين .. ومو عرفانين مع مين بدكن توقفو بهالأزمة الانسانية ..
معكن حق تضيعو شي بيضيع .. بس يلي مع سلاح المقاومة وضد الصهيونية ما بيضيع ابدا .. بيكون موضوعي شوي بكلامو وبنظرتو وفكرو .. يلي عم يقاتل النظام يا حضرة اليساري المناضل هني مجموعات مسلحة مدعومة من المخابرات والدول الاقليمية مجموعات متطرفة عم تدبح وتخطف وما ضلت جهة عالمية ما وثقت هالشي اذا ما بتوثق فينا نحنا ..
هي منظمة الأمم المتحدة المتباكية على شعبي بتأكدلك هالشي .. وحزب الله دخل المعركة لانو كانت المعركة رايحة لعندو .. ولعندك .. وعلى فكرة لا حزب الله ولا نحنا ضد المعارضة طبعا اذا كانت بحق معارضة ..
للاسف انا شب تجاربي لا تستحق الذكر .. وفكرت كتير قبل ما اعطيك هالمحاضرة بس لا بد من الاضاء على العتمة يلي بعقلك وبداخلك ..
وسلملي على اصحابك المعارضين اليساريين ميشيل كيلو وجورج صبرا .. يلي بيرفعو الراس فعلا وبشهادة سعودية.

Saeed kadmosy
24/12/2013

 

اترك رد

لن يتم نشر عنوان بريدك الإلكتروني.