بلا سياسة: الحق عالحَكَم…
موقع إنباء الإخباري ـ
حسن ديب:
يا خيي هو فعلاً الحق عالحَكَم، هو يلي نزع كل القصة، يعني لو ما يحتسب ضربة جزاء لصالح البرازيل ضد كرواتيا كان مجلس النواب ناوي يجتمع تينتخب رئيس للجمهورية، بس الحق عالحَكَم، الجماعة كانوا عم يلبسوا تيابن ونازلين عالمجلس بس لو ما يصفر البنالتي، أخخخخ لو بعرف هالإبن الحرام مين دافشو علينا لحتى عمل هالعملة، يا خيي ما بينلاموا النواب ما بينلاموا، الحكم زعبر وهيدي قصة لازم يوقفوا عندا ما بيصير إنو تمر مرور الكرام هيك، ولو، شو بدا تقول عنا كرواتيا، بدكن يقولوا الكروات إنو السياسيين اللبنانية ما عندن نخوة، باطل، ولك إذا البرازيلية ملوك الطابة نحن ملوك النخوة، نحن بننتخي عكل شي إيه عكل شي ما خصو بالمواطن بتلاقينا انتخينا وهبينا هبة رجل واحد، ولو كيف لكن، بعدين لو ما هالهبة من السياسيين ما كان عرف اللبناني انو الحكم زعبر لإنو ما عم يتابع المونديال والسبب إنو دولتو الكريمة طفرانة ما معها تدفع مصاري لتنقل المباريات وبنفس الوقت ما قدرت تشحد حق النقل من دولة شقيقة، إيه شقيقة لكن مش شقيقة.
وكمان يا خيي إنو ما فينا نضل نلوم السياسيين عطول، ما هني ما بدن يشغلوا بال المواطن أكتر ما هو مشغول، إنو مين ربح مين خسر مين زعبر، خلص ريح بالك واتركن هني يتابعوا عنك. ما هني أخدوا كل شي منك وإنت ساكت، يعني حبكت عالمباراة. والجماعة مش مقصرين يعني عم يتابعوا عنك بس بجدارة، وما بخبي عليك إني عملت جولة عالطقم السياسة وجبتلك أخباروا الرياضية، مثلاً يعني إنو مثلاً، بتلاقي 8 آذار حسمت خياراتها الرياضية على الشكل التالي:
كتلة الوفاء للمقاومة بتشجع المنتخب الإيراني، كتلة التنمية والتحرير بتشجع المنتخب البرازيلي وبقوة كمان والدليل إنو علم الحركة كان موجود بالمباراة الإفتتاحية، كتلة الإصلاح والتغيير هولندا للعضم ما في كلام ( ويروى انو بعد خسارة اسبانيا أمام هولندا صرخ الجنرال البرتقالي وقال ما بتوصلوا لزناري)، كتلة النائب فرنجية قالت كلمتها إنو وين بيروح الجنرال نحن معو حتى لو شجع البوسنة والهرسك.
كتلة القومي والبعث، بيشجعوا المنتخبات التلاتة يلي ذكرتن كرمال مبدأ التحالف، أما طلال إرسلان متل عادتو زعلان وما عم يشجع حدا…
هيدا هو الوضع الكروي عند 8 آذار، وهو وضع محسوم مسبقاً نظراً لقوة التحالفات السياسية المتينة.
أما الوضع عند 14 آذار فهو على الشكل التالي:
كتلة المستقبل عم تشجع البرتغال مش كرمال شي بس جكارة بالإلمان لإن الجماعة ما عم تتقطع معن قصة خسارة السعودية بالزمانات من إلمانية بنتيجة لا يتخيلها أي برميل نفط، مع بعض التعاطف مع المنتخب الهولندي تحسباً لأي تقارب بالمناخ الإقليمي.
كتلة الكتايب، فرنسا للموت، الجماعة أصحاب مبدأ وما بيتركوا الأم الحنونة لحالها أبداً،
كتلة القوات، عم يشجعوا مين ما كان المهم إنو يكونوا موجودين بالخبرية،
الأمانة العامة ل 14 آذار بعد ما حسموا خيارتن لسببين، الأول إنو ما حدا خبرن إنو في مونديال والتاني لإنو فارس سعيد مشغول بالهجمة الشيعية عالمشاع المسيحي بجبيل.
وبيبقى جماعة الوسطيين وهودي أحلا شي يعني هيدول حياديين أد ما بدك قول وهني عالشكل التالي: أبو شربل العمشيتي ما فارقة معو مين بيربح الزلمة جنّس يلي بدو يجنسو وعمرو ما حدا يورث،
الرئيس سلام بيشجع الأرجنتين والسبب وجود شبه زنبقة بالعلم الأرجنتيني والزنبقة تعتبر رمز العائلة السلامية…
ووحدو بيبقى بو تيمور متل عادتو عم يلعبها عطريقتو، هو مع الكل وضد الكل بنفس الوقت ومش رح نعرفلو حرف من طرف قبل المباراة الختامية، لإنو متل عادتو مع نهاية المباراة الختامية ولما الحكم يطلق صافرة النهاية رح نلاقي بو تيمور مع الفريق الربحان طبعاً مع بعض الإعتذارات المعتادة عن هفواتو البسيطة خلال المونديال.
بكل بساطة هيك راكبة الخبرية، وكرمال هيك عزيزي المواطن ما تحمل هم لإنو كل السياسيين عم يشجعوا عنك وبالنهاية متل العادة أربع سنين وبيمرقوا، وصدفة حلوة إنو كل أربع سنين في مونديال وكمان كل إربع سنين في مجلس نواب، بس انشالله ما بيمددوا للمنتخب الإسباني متل ما مددوا للمجلس النيابي لإنو بعد العرض الإسباني مبارح تبين إنو المنتخب الإسباني متلو متل نوابنا مش خرج شي.
كرمال هيك عزيزي المواطن، خلي بالك طويل، وأد ما فيك طولو حتى لو صار يشحط وراك، مش مشكلة، ما نحن شعب تعود عالشحشطة، وكل مونديال وإنت بخير، وأجمل شي بالمونديال إنو بيجمعنا كلنا… بلا سياسة.