بلا سياسة: صحوة عرب

موقع إنباء الإخباري ـ
حسن ديب:

العمى شو هالعنوان يلي طلع معي عند هالصبح (صحوة عرب)؟
صراحة ما بعرف كيف طلع معي بس حسيتو بيشبه إسم شي فيلم تاريخي قديم، إيه قديم، ما هنّي العرب شعب قديم كان ولا يزال كل شي عندو قديم، يعني عادات على تقاليد على منسف ورقصة سيف وملك اللهم عافينا اذا الله ما كذبني حاضر عيد ميلاد نفرتيتي، وولي عهد إجر بالقبر وإجر برا، وولي ولي عهد هو مبتكر داء الزهايمر، ولو ما لطف الله كانوا ضلوا يركبوا أولياء عهود لحتى ما ضل في مواطن من العيلة المالكة إلا وركب ولي من بعد ولي…
هلأ هيدي القصص معروفة وأصلاً عند العرب أهم شي ما حدا يقرّب عالشرف، وغير هيك كل شي ممكن ينوجدلو حلول، بس أهم شي ما حدا يقرّب عالشرف العربي، وحتى ما حدا يتفصحن ويقلي فلسطين شوووووو، يا خيي فلسطين بالنسبة للعرب هيدي من خارج الملاك، والشرف العربي حدودو خيمة الملك ومرسة الناقة، وكلو وما حدا يدق بالناقة…
ومحسوبكن متل ما بتعرفوا، لا ناقة لي ولا جمل بكل شي سياسي عم يصير بهالدني، أصلاً أنا ما بحب السياسة ولا السياسيين ولا حتى شراب السوس، وأصلاً أصلاً من زمان ما بحضر تلفزيون ولا بتابع أخبار حتى ضل مريّح راسي، ولكن من وقت لتالت، إلا ما تمرق إدامك شي خبرية سياسية عن طريق الصدفة تخليك ولو عن غير قصد تندهش، متل ما صار معي من كم يوم.
والله يا جماعة من كم يوم قاعدين إدام هالبيت عم نأركل نحن والأصحاب وإذ…. بجاري ما غيرو يلي خبرتكن عنو من شي سنتين، ما بعرف من أيا حيط رشح وطرقني السؤال العجيب:
يا ماااااااان شو قصة العرب وعاصفة الحزم؟؟؟
بيني وبينكن أول شي فكرت إنو خلص الدم العربي وصل لمرحلة الغليان وملوك العرب وعلى راسن المرخاني المعظم، مسكّر راسن من شي عملة يهودية وخلص أعلنوا الحرب…
لهيك اذبهلّيت لبرهة من الزمن وقلتلو ما عندي علم بشي. خير شو القصة؟ خبرني
إلا وبيقلّي العرب أعلنوا الحرب عالحوثيين…
أووووف العمى، يمكن سمعت غلط، قلتلو عيد عيد شو الموضوع، قلي عم إحكيك عربي، العرب أعلنوا الحرب عالحوثيين وسموها عاصفة الحزم…
إيه يا باطل عهالخبرية، إنو العرب يعلنوا الحرب، هيدي بحد ذاتها خبرية لا تصدق، يعني الجماعة آخر مرة شاركوا بحرب كان وقتها بمعركة أحد (وكانوا صافّين مع قريش ضد المسلمين)، فشو فيقهم هلأ عالحرب؟
لا وقال شو اتحدوا ع ضرب الحوثيين، وأنا يلي كنت مفكّر الحوثيين عرب، طلعت غلطان وطلعوا الجماعة من كوكب آخر، وطلعوا بيشكلوا خطر عالعروبة أكتر من اليهود ومن الصهيونيات المتعددة، وللوهلة الأولى قلت يلي عم يصير غلط، بعدين انتبهت إنو عم نحكي عن العرب، إيه لحظة لحظة، ما زال عم نحكي عن العرب يعني يلي عم يصير شي طبيعي، ويلي مش طبيعي إنو يصير غير هيك.
يعني إنو العرب يضربوا العرب هو شي طبيعي، أما إنو تفيق شي يوم وتلاقي العرب أعلنوا الحرب عاليهود أو عالصهيونية الإسلامية فهيدا الشي يلي مش طبيعي، وليه عرب هيدول عرب، يعني جماعة الخيمة والنوق والخواريف، إيه خواريف، ما هني لو ما خواريف ما كانوا باعوا فلسطين وشدوا الحزم عاليمن…
إيه خواريف، ما هو ما في غير الخاروف كل الناس بتسحسحلو وما بيسترجي يرد إلا عالخاروف يلي متلو…
وقال لا، المصيبة لما يطلع خاروف لبناني بدو يدعم الخاروف العربي ويزقفلو ويقلو ايه أضرب ولا يهمك، وليه إنت شو أخدك عموضوع اليمن، ما تعى بالأول عموضوع لبنان وبلكي بتتفقوا ع شي خاروف يعمل رئيس جمهورية، وليه يا دكر الكذبة باليمن راكبة إنو شالو الرئيس، طيب تعا يا مان ركبولنا رئيس وبعدين شيلوا وعملوا ثورة وولعوها، إيه هيك بتزبط، أما إنك تدعم وتهلل وتفرفر وإنت أصلاً ما عندك رئيس، ف بدك تسمحلي بلكي يعني بتسكر… عالموضوع، وبتلتهي بشحارك.
يا خيي عن جد مصيبة، كل مرة بقول خلص خليني ساكت وشو بدي بالناس، هيدا صرح وهيدا شجب وهيدا حرض وهيدا قبض، بس بيجيك واحد بيحكي كم كلمة بيطلعك عن سكوتك، وصراحة أد ما صرت طالع عن سكوتي، بطل في ثقة بيني وبينو، ومن هون لنرجع نبني ثقة جديدة خليها ع الله وخلينا بلا سياسة …